Որովայնի փքվածություն. izmirlianmedicalcenter.com

Ախտանիշ, որ հանդիպում է բարակ աղու մի շարք հիվանդությունների, ինչպես նաև որոշ ֆունկցիոնալ հիվանդությունների դեպքում։ Այս երևույթը պայմանավորված է բարակ աղիում ավելցուկային գազագոյացմամբ։

Ռիսկի գործոններ

Ռիսկի խմբում են.

• ցելիակիայով հիվանդները,
• գրգռված աղու համախտանիշով հիվանդները (ֆունկցիոնալ փորկապություն կամ լուծ)։

Կլինիկական դրսևորումներ

Ցելիակիան արտահայտվում է մի շարք ախտանիշներով. լուծ` պոլիֆեկալիայով և ստեատորեայով, երկաթդեֆիցիտային անեմիա, հիպոկալեմիա, հիպոկալցեմիա, ցնցումներ, հիպոպրոտեինեմիկ այտուցներ, երեխաների մոտ հետ է մնում ֆիզիկական զարգացումը, կանանց մոտ՝ ամենորեա, անպտղություն։ Որովայնի փքվածությունը պայմանավորված է հիպոկալեմիայի հետևանքով աղիների տոնուսի իջեցմամբ, ֆունկցիոնալ հիվանդությունների ժամանակ` աղիքային ֆերմենտների ցածր պարունակությամբ և թաղանթային մարսողության խանգարմամբ։

Ախտորոշումը

Որովայնի փքվածությունը որպես ախտանիշ հայտնաբերվում է կլինիկական դրսևորմամբ, ախտորոշումը այդ ախտանիշի առաջացման պատճառի որոշումն է։

«Ցելիակիա» ախտորոշումը դրվում է իմունաբանական թեստերի հիման վրա՝ հյուսվածքային տրանսգլուտամինազայի նկատմամբ հակամարմինների որոշմամբ, տասներկումատնյա աղու ստորին հորիզոնական ճյուղից բիոպտատի ձևաբանական հետազոտմամբ։ Այդ բիոպտատների հոմոգենատում որոշվում են ֆերմենտները՝ կարբոհիդազաները, որոնց պարունակության իջեցումը բերում է մարսողության գործընթացի խանգարման ինչպես ցելիակիայի դեպքում, այնպես էլ` գրգռված աղու համախտանիշի դեպքում։  Ածխաջրերի մանրէային ճեղքման արդյունքում,  բարակ աղիներում բակտերիաների տարածման դեպքում առաջանում են գազեր՝ բերելով փքվածության առաջացման։

Բուժումը

Բուժումն ամբուլատոր է: Ցելիակիայի դեպքում հարկ է  ամբողջ կյանքում խստորեն հետևել ոչ գլյուտեինային սննդակարգին: Ֆերմենտների անբավարարության դեպքում խորհուրդ է տրվում պահպանել ցածր ածխաջրային սննդակարգ, նաև նշանակվում է ռեբամիպիդ` 100 մգ, օրը 3 անգամ, 3 ամսվա ընթացքում։

Ստացիոնար. ներծծման խանգարման համախտանիշով ցելիակիայով հիվանդներին նշանակվում է ոչ գլուտեինային սննդակարգ և նյութափոխանակային խանգարումների շտկում  (ալբումինի, կալիումի աղերի, կալցիումի, վիտամինների, երկաթի պրեպարատների ներերակային ներմուծում)։

Հսկողություն։ Ցելիակիայով հիվանդները գտնվում են դիսպանսեր հսկողության տակ, խորհուրդ է տրվում բժշկին այցելել 6 ամիսը մեկ անգամ։ Ռեբամիպիդով բուժման դեպքում խորհուրդ է տրվում բարակ աղու լորձաթաղանթում ֆերմենտների պարունակությունը կրկնակի ստուգել 3 ամիս հետո։

Հարցեր, պատասխաններ, մեկնաբանություններ